මේ නම දැක්කාම ඔබට විවිධ අදහස් මතුවෙන්න ඇති. නිහඬ කෙනෙක් සහ ක්‍රියාශීලී කෙනෙක් ගැනද? චරිත දෙකක්, රටවල් දෙකක්, කාල දෙකක් හෝ පරම්පරා දෙකක් ගැනද? පොත කියවා අවසන් කළ ඔබට, දැන් ඒ නමට ඔබේම අර්ථයක් ඇති.
එකම දෙයක් දිහා බලන අපි හැමෝටම පෙනෙන්නේ එකම දේ නෙවෙයි. මේ පොත ලියන්න මාව පෙළඹවූයේත් ඒ සිතුවිල්ලයි. වියට්නාම් සංචාරයේදී මම දකින දේවල් දිහා බැලුවේ "මේකෙන් අපිට ඉගෙන ගන්න පුළුවන් මොනවාද? අපේ රටට ගැළපෙන විදිහට මේක කරන්න බැරිද?" කියන ප්‍රශ්න එක්කයි. ඒ සිතුවිලි තමයි අදහස් එකසිය එකක් විදිහට ඔබ අතට පත්වුණේ.
ලංකාවට වෙනස් දෙයක් දෙන්න මට ඕන වුණා. ඔබට හුරු පුරුදු දෙයක් තුළත් අලුත් අවස්ථාවක් දකින්න මේ පොත උදව් වුණා නම්, ඒ උත්සාහය සාර්ථකයි. මේ පොත කියවලා පැත්තකින් තියන්න එපා. ඔබට ගැළපෙන එක අදහසක් තෝරාගෙන, ඔබේ පරිසරයට ගළපා, කුඩාවට අත්හදා බලන්න. එයින් ඉගෙනගෙන ඉදිරියට යන්න. කවදාහරි 'මේ පොත කියවලා මම මේ වැඩේ පටන් ගත්තා" කියලා ඔබ කිව්වොත්, ඒක තමයි මට ලැබෙන ලොකුම සතුට.
පොත මෙතැනින් අවසන් වුණත්, ඔබේ අලුත් කතාව මෙතැනින් පටන් ගන්න පුළුවන්. ඔබට ජය!

වරලත් ගණකාධිකාරි
විරාජ් හේනේගෙදර